هو البيزنس الذي لم يأخذ القدر الأدنى من دراسته من حيث الجدوى وبالتالي يفشل في القيام بوظائفه التي بني من أجلها...ويسمى فاشل لأنه بني على خيال ولم يبنى على الحقيقة والواقع.
.امشي بدماغك عشان انت مافيش زيك وماتسمعش من حد ولا تسأل حد.. لاخبير ولا معلم ولا حد جرب ..وحاسب من كل واحد بيشتغل في الصنعة اللي حتعملها ولاتأخد منه فكرة ولاتسأله ولاتقرأ في كتاب كل افكار الكتب نظرية مش عملية وقديمة ولاتبحث علي الانترنت لأنه كله كذب وافتراء ولاتسأل الناس بتحب ايه..انت ادري وفاهم وحتعمل الصح وانت مولود بزبز مان خصوصا انك ممكن تقلد اي شغل ناجح وتعمل احسن منه..وياريت تفتح جنبه وتاخد زباينه وتعمل كل منتجاته وماتغيرش فيها عشان هي نجحت عنده وحتنجح عندك.
..مش مهم تعمل بيزنس تكون بتفهم فيه عشان انت حتبقي مدير مش صنايعي يعني شغل تحت ايدك اللي بيفهموا في الصنعة والحاجات البسيطة دي وانت معلم.
وبالنسبة لطلب الناس ورأيها المهم تعمل الحاجة اللي عاجباك وبتحبها وطالما انت بتفهم وعندك ذوق فالناس حتحب منتجاتك بعد شوية لما يتطوروا ويفهموا علي ايدك ولو المنتجات عجبت الناس اثبت وماتغيرهاش علي طول.
… كل ماكبر يبقي احسن واعمل احتياطي كبير علي جنب يمكن يعوزه البيزنس حتي لو حتقترض بأي فايدة او تكاليف المهم الفلوس اللي في البيزنس تكون كتير عشان الفلوس بتجيب فلوس والمهم تجيب كل اللي انت عايزه والبيزنس عايزة وبزيادة عشان المنظر .. واعي تشارك حد وتديله خيرك..ممكن يستثمر عندك بس وباي فايدة..بس مالوش دعوة بالادارة ولا بالبيع والشراء حتي لو دكطور.
..اهم حاجة يكون البيزنس متكامل وكامل.. مما جميعه لايحتاج حد ولايستني حد ..مكنك والاتك وعربيتك النقل عندك ولو حتي حتستخدمها مرة واحدة عشان ماحدش يتحكم فيك و مخازن عشان تخزن لغاية ماتحتاج تستخدم ومعارض عشان ماتتحايلش علي حد يبيعلك وفريق تسويق بتاعك خصوصي لو مثلا عندك مطعم ..اعمل فرن عيش وربي فراخ وربي مواشي وخرفان عشان الضاني وجديان عشان النيفة وازرع رز كمان حتي مفارش الترابيزات والفوط ولبس العمال أعملهم مغسلة ومكوي عندك وياريت مصنع علف للبهايم ..كده انت كامل متكامل كله كله عندك ماتخليش حد يأكل عيش علي قفاك ولايستغلك.
..ياعم ابائنا واجدادنا كانوا معلمين وهما مابيعرفوش يقرأوا(بس كانوا بيعرفوا يحسبوا).. سيبك من الناس المعقدة اللي بتقولك ادرس وابحث وتطول في الحوار.. البيزنس فلوس وعقل نضيف..والعلم في الرأس مش في الكراس ..وبلاش تعمل زي الجاهل(قصده عليه تقريبا) اللي بيقولك احسبها وتوكل وهي اصلا اعقلها ..يعني حط دماغك وعقلك فيها…والمهم كل بيعة تكسب معاك ولو نص جنيه وحتجمع وتغطي نفسها أكيد.
ركز في كل حاجة والكلمة كلمتك ورأيك يمشي صح او غلط عشان الاحترام اهم من اي حاجة والمال مالك ..رصص كل واحد مكانه وفهمه يعمل ايه وماحدش يألف ولا حتي يقترح عليك عشان كده حيقل منك قدام الباقييين.
مافيش حاجة في الشغل محتاجة فن.. هات عمالة علي القد وخلي مرتبات العمال والموظفين صغيرة عشان توفر وعشان ماحدش يتمرد عليك ولايكبر وينافسك وماتدربهمش عشان افرض مشيوا بعد ماصرفت عليهم ولما تحس انهم بدأوا يفهموا غيرهم دايما وهات ناس جديدة رخيصة عايزة تأكل عيش وفي حالها.
… ياريت ماتشغلش نفسك وماتعملش حساب للمنافسين لافيهم واحد بيفهم زيك ولا منتجاتهم حلوة زي منتحاتك وحيقفلوا لوحدهم لما الناس تفهم شغلك وتسيبهم وتجي تشتري منك وانت كده والا كده حتبقي ملك السوق.
– كل ده مردود عليه.. الزباين كتير وانت يهمك الزبون اللي بيفهم ويقدر ..وحتي لو مافهمش ..البلد دي حوالي ١٠٤ مليون يعني لو كل واحد حتي جرب مرة وماعجبوش حتبقي ملياردير قبل سنة..وكل ماتتزنق نزل الاسعار واعمل عروض وبيع بالتقسيط…حتي لو ماكسبتش حتحرق دم الاباعد اللي بينافسوك في السوق.
لو القصد مكانتك يعني مكانك ..فالناس حتجيلك مهما كنت بعيد ولو الطريق مولع طالما انت بتبيع رخيص وطبعا اول ماتفتح بيع رخيص عشان تعمل رجل
..اما لو القصد مكانتك يعني منظرك بين الناس والتجار فلازم عربية فخمة ولو قسط ولبس مستورد وكده
ولو القصد مكانتك يعني وضعك التجاري وسمعتك وكده ..استغل في اكتر من تجارة جنب مشروعك وانتهز الفرص واشتري الواقع واستغل الخسران والمفلس حتكسب كويس وتستمر والمهم مش بس انت تعلي وتطلع ..لازم كمان غيرك يقع وينزل.
مش من الضروري دراسة القرارات الي بتاخدها او يكون في خطة بتمشي عليها . كل الي عليك تاخد قراراتك بشكل مفاجئ وعشوائي وعلى فريق العمل انه ينفذها بدون نقاش .
تم جمعه
By Raghda Elhamly
.jpg)
.jpg)
.jpg)
Copy Right 2018
