السلام عليكم.. معاكوا محمد المهدي.. هتلاقوني بسجل كل شوية خواطر.. الخواطر دي ممكن تكون موجودة وأنا في العربية, وأنا في الشارع, وانا في مكتبي, وأنا في بيتي.. بيجي في ذهني حاجة معينة وعاوز اوصلهالكوا.. بسجلها على طول وبجمعها.. هتلاقيها في مواضيع كتير خاصة بتطوير الذات, خاصة بالعلاقة بالمحيط, خاصة بطرق النجاح, خاصة بأشياء هتنفعنا وهتفدنا كلنا ان شاء الله.. وهتسمعوها دايما في كل الأوقات المختلفة اللي أنا ممكن أسجل فيها.
تحياتي ليكوا.. وأتمنلكوا سماع رسالة هادفة.. اتفضلوا...
السلام عليكم.. خاطرة جديدة.. ولكن هذه المرة في المقابر.. بزور والدتي في المقابر الله يرحمها.. الخاطرة اللي جات على بالي هي تذكر الأحباب.. أنا جيت في تلاتة افتكرتهم.. أول ما دخلت المقابر جيه على ذهني تلاتة.. اول واحد في شارع رقم 6 نادر صاحبي ده من اصدقائي وكان زميلي في جامعتي من الرجالة أوي اللي اتعرفت عليهم ومات سنة 2016 شهر 1 في حادثة ربنا يرحمه ويغفرله.. افتكرت طبعا ذكريات وحاجات كانت مابيني ومابينه ودعيتله.. حبيت بس أوصل إن الأصدقاء تربطهم علاقة تخليهم لو حتى راحوا القبر يفتكروا بعض.. يعني أنا لما جيت المقابر افتكرته من ضمن اللي هزورهم.
وبعد كدة الشخص التاني اللي أثر فيا أو اللي روحتله وزورته بعدها أستاذي.. أستاذ عمر الشرقاوي رحمة الله عليك.. ده كان من أفضل المدرسين اللي درسولي على مدار حياتي.. هو اللي حببني في الرياضة هو وأستاذ محمد خلف.. وأستاذ عمر برده زورته ودعيتله وافتكرته.. أستاذ عمر كان في شارع 9.
وبعد كدة روحت أزور المقابر بتاعتنا بتاعت العيلة.. أمي الله يرحمها.. وافتكرت بقى كل حاجة حلوة.. الأم يا جماعة.. انا لو حكيت عن الصحاب فده حاجة جميلة ولو حكيت عن الأستاذ اللي علمني فده برده هفرضله كلام وهقول وهتذكر.. يعني ايه أستاذي ويعني ايه من علمني حرفا صرت له عبدا.. ويعني ايه صاحب يقف جنبك وفي ضهرك وقت ماهتحتاجه هتلاقيه.
إنما الحاجة اللي تفوق كل ده.. الأم.. حب الأم.. الله يرحمها ويغفرلها ذنوبها.. حب الأم ده حب دون شروط.. كل واحد فينا كدة يفتكر أمه بتحبه ازاي هتلاقيه بلا شروط.. هي بتحبك وخلاص..بطريقتها بقى.. خدوا بالكوا كل حب له طريقة, له أسلوب.. لكن الأم بتحب حب لا مشروط.. عاوزة تريحك وخلاص.. عاوزة تعملك اللي نفسك فيه.. عاوزة تقدملك..حب الأم ده لما بيوصل للإنسان ويستشعر به بيعرف قد ايه ان الحب له معنى مفيش اتنين يختلفوا عليه.
أنا بس الحاجة دي استحضرتني عشان افتكرت أمي الله يرحمها.. كانت ست حنينة أوي وكانت طيبة أوي وياما ياما ياما مواقف كتير حصلت مابيني وبينها.. قد ايه كانت بتحبنا وقد ايه كانت بتعمل حاجات كتير جدا بتظهر حبها لينا وهي كانت حنينة أوي بصراحة.
رحمة الله عليكي يا أمي ورحمة الله على كل أمهات الجميع ويا رب اللي أمه موجودة يعرف قيمة الأم ويديها حقها بجد.. السلام عليكم...
By Mohamed Elmahdy
لمتابعة القناة على اليوتيوب اضغط هنا
للإستماع إلى الفيديو لهذا الموضوع اضغط هنا
ولمزيد من المعلومات عن العلاقة بالمحيط اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
