في حاجة ممكن مكونش شايفها بس هي أحس من اللي شايفها؟.. أنت بتقول ألغاز ولا ايه؟.. هو احنا عندنا نعم مش شايفينها أحسن بكتير أوي من نعم احنا شايفنها؟.. طيب تيجوا نعرف ايه اللي أنا بقوله ده؟.. يالا بينا نعرف...
السلام عليكم ورحمة الله وبركاته.. النهاردة جاي أتكلم معاكوا عن موضوع مهم جدا وبيتغافل عنه ناس كتير أوي يا جماعة.. النعم اللي ربنا سبحانه وتعالى ادهالنا كلنا.. في نعم كتيرة جدا غير مرئية احنا مش شايفنها مش بناخد بالنا منها ومش بنشكر ربنا عليها وبعدين نرجع بعد كدة نتذمر ونزعل ونحزن ونقول ليه يارب واشمعنا وفلان وعيلان وسين وصاد وقال وقيل.. طيب ماتدينا مثل.. بحب أنا دايما اضرب أمثلة عشان كلنا نستوعب الموضوع مع بعض..
في كتير مننا مش بيستشعروا نعم موجودة في الجسم.. مثلا نعمة الكلام اللي أنا بتكلمها دي.. في كتير مش واخد باله انه بيتكلم وغيره أخرس مبيتكلمش, التنفس.. في ناس مبتشمش وأنت بتشم, النظر,السمع, وهكذا وهكذا.. حتى التذوق.. دي النعم اللي موجودة في الجسم اللي احنا مش بنحس بيها ومش بنستشعرها إلا لو فقدنا حاجة منها ساعتها نحس بالنعمة دي.
طيب في نعم تانية موجودة واحنا مش واخدين بالنا منها.. نعمة الستر.. ربنا سبحانه وتعالى لما يستر عليك ولما يجعلك في وش الناس اللي حواليك محترم وكويس في حين انك في أوقات كتير جدا مابينك ومابينه بتعصاه.. نعمة الستر دي نعمة غير مرئية.
نعم كتيرة دايما لازم نبقى واخدين بالنا منها يا جماعة احنا مش شايفنها ومش حاسنها وبنقعد دايما ندور على النعم المرئية اللي هو أنا عاوز يبقى معايا فلوس فتمسك الفلوس حالا.. عاوز أخرج أتفسح وأروح الحتة الفلانية وأسافر الدولة العلنية.. عاوز أتجوز الواحدة اللي بحبها والجميلة وأحلى واحدة في الدنيا.. وكل الكلام ده.
فبنفضل طول الوقت نجري ورا النعم اللي عاوزين نمسكها بإيدينا وبنتغافل النعم اللي احنا مش ملاحظينها.. نعمة الأولاد أحيانا مش بنحس بيها مش بنستشعرها.. اللي يحس بيها اللي معندوش أولاد.. نعمة الزوجة الصالحة اللي بتريحك, اللي بتقف جنبك, اللي بتسندك.
لو كل واحد فينا استشعر النعمة اللي ربنا سبحانه وتعالى ادهاله اللي هو مش شايفها هيعرف قد ايه حكمة ربنا, مش بيقولك "لو علمتم الغيب لأخترتم الواقع".
في حاجات كتيرة أوي غير مرئية كمان في الغيب احنا منعرفهاش.. يعني ممكن يكون ربنا سبحانه وتعالى منع عننا أذى احنا منعرفوش.. عارفين زي مين مثلا؟.. زي سورة الكهف لو تفتكروا كدة.. الخضر في القصة التانية بتاعة سيدنا موسى.. الغلام.. عارفين الغلام اللي قتله سيدنا الخضر؟.. عارفينه.. لحد النهاردة أمه وأبوه ميعرفوش ان قتل الطفل ده كان مصلحة ليهم لأنه لو كان كمل كان هيبقى طفل عاق وكان هيغلبهم وهيتعبهم وربنا سبحانه وتعالى أبدلهم بطفل تاني ولد صالح.
فلازم نبقى عارفين كويس أوي ونستشعر معنى مهم جدا جدا هيفرق في حياتنا كتير.. ان في أوقات كتير أوي احنا عندنا نعم لكننا نغفلها.. إذا استشعرناها سنشعر بالسعادة.
شكرا ليكوا.. ويارب دايما نفيد بعض.. السلام عليكوا...
By Mohamed Elmahdy
للإستماع إلى الفيديو لهذا الموضوع اضغط هنا
ولمتابعتنا على اليوتيوب اضغط هنا
ولمزيد من المعلومات عن اعرف نفسك اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
